Gen 12 | YON | STEP | Kwane, Yarimanbed Abram yaa yedmenoon, “Ewambe yokadiib eb karubkimiib eb ambibkiniib domondekorewa, nembed ambibkin maa korokbebdaniin yaa wene.

Genesis 12

Andowoon 12:1-7

Godbed Abram Yaa Baandoon

1 Kwane,Yarimanbed Abram yaa yedmenoon,

“Ewambe yokadiib eb karubkimiib
eb ambibkiniib domondekorewa,
nembed ambibkin maa korokbebdaniin yaa wene.
2 Kwane, nembed eb awoya yemoon bangkabdaniina ambibkin yeweb kere yemoon kai keraniib.
Kwane, amun kerubdaniin.
Kwane, ongmaniina eb aningko kuu darewoob keraneen.
Kwani kowe, eb yaambed yena kuu amun kerundaneen.
3 Kanembed eb yaa amun kerubdaneen kuu nembed amun kerunaniin,
kuned kanembed arewa kerubdaneen kuu nembed arewa kerunaniin.
Eb yaambed ambibkindan korem yaa kuu amun kerundaneen.” andoon.
4 Yarimanbed kwanandoone Abram wengamberekore kwanoon, ye kuu Haran taun angkambed Lot yoom domonde winiwen. Kuyaron kuu Abram ye weeb kuu 75iib. 5 Yembed ye wonong Serai yoom ye daman ye mingki Lot yoom kuu ye deme karuwiib ye yiribman korem Haran angkambed booniib kuu be Keenan ambibkin yaa wonoon. Kwane wene Keenan ambibkin nandene, 6 wene More ye at kubun keedbon kambong Sekem dia kwane kuyaa doboroon. (Kuyaron kuu Keenandan kuu kuyaa doriib.)

7 Doboroone,Yarimanbed wadbare angkaderene Abram yaa yedmenoon, “Ambibkin kee eb yob yaa kondaniin.” andoon. Kwanandoona, Abrambed bot wuuboon,Yarimanbed ne yaa angkadoroon kii ande korokbi yeman.

(Abram yoom ye yoom winiwendan yoom kuu Keenan ambibkin aom dewinimaib, ye dingkan kab kuu kereek yemoon animaib kowe. Yi kuu ambib anam yenbenabindo, dingkan kadbed ongmiwen ye ambib kombon aombed dangimo kamen yariwen. Kwane, bidambib maa yaa wanande kaimaib kuu yi ambib kombon yeman kuu bedmenabe be kemo yi angkurom ari nongkobekorib bewinimaib.)

(Yi kuu animan kab ma kibingkindo, dingkanmo bangkanandiwen. Yi dingkan yena kuu animaib, yena kuu ari berengkimaib, karub yena yi berengke yeen ani dowad. Kuye od kuu Abram ye nimakarub yoom kuu karub yena yaambed yongbon animan berengkimamiwen. Wiid yob kangkon berengkekorib flawa ongmenib bred nengkimamiwen.)|H 8 Amaan angkon koronde kuri wene aangkobon ambibkin angka angkanoon. Kambong Betel kaom kere kambong Ai kangka kere wedyiri kombon be arume doboroon. Kuyaambed angkon bot wuube dingkan nengke agedmo keroone baeb kuu Yariman God yaa koni yeman ye bon wuubekore, kurikuriyiib kubiyiib Yariman God yaa konoon. 9 Kwane, mim kuyaamo dobirindo, wene kuyaambed dobere dobere Keenan aom kuri doboroon.

Abram Idyip Yaa Wonoon

10 Keenan ambibkin aom am kainoona animaniibban keroona mungimo dobereniiwa koronde anuk ambene wene Idyip ambibkin anuk wonoon. 11 Wene Idyipdan yi okad dia aomnande yedmoon ye wonong yaa “Kub kuu kerengkandimbon kowe, 12 Idyipdanbed meenaniib kuu kub kuu ne wonong ande meenenekoriwa, ne kuu nekoriwa, ub kuu nendaniib kowe, 13 minibka yedmende kub kuu ne daman ande. Kwane kub yaambed ne kuu nokban kere amun amun kamaniib.” andoon. 14 Andekore, Idyip bid aom aomnoona Idyipdan kuu ye wonong kuu wedmendiwen kuu kerengkandimbon wonong. 15 Kwane Idyip yi king Fero ye korok korok yena wedmendekoriwa, king yaa yedmeniiwa yembed yi yaa yedmendoone, wene Serai kuu nende king yambiwoom winiwen. 16 Yu dowadbed Abram kuu kingbed ongme oonenoon. Kwane, sibi yemooniib naningkod yemooniib buromakau yemooniib donki yemooniib kemo yemooniib kakmaniibban deme ye karub yemooniib bangkanoon, Abram yaa.

17 Serai nende yambiwoom kowoon ye dowadbed ye yoom yambiwoom karub doriib yoom yaa Yariman Godbed yi korem yaa korere darewoob maa maa kondoon. 18 Kwanoona, kingbed Abram yaa kaamonoon “Eb komo kamewen, ne yaa? Komoyiibkob Serai kuu ne wonong ande yedmewindo kerewen? 19 Komande yu kuu eb daman andekorewa, yu kuu munuunkob ne wonong keraan? Eb wonong kei nenwene keyom koronde yaro wene!” andekore, 20 king ye korok korok yaa yedmendoona Abram nendeniiwa ye wonong nendeniiwa ye barang korem bekoriwa ambibkin kuyom kuu be wene bunangka domondiiwe winiwen.